San Markos-eko Mankomunitatea
San Markos-eko Mankomunitatea
Joan den urtean hiri-hondakinen sorrera murriztu egin zen, baina 2006. ekitaldian datu orokorrak berriz ere gora egin du eta ia 2004. urtean lortutako gehienekora iritsi da. Gorakadak gure ingurunean dugun hondakinen sorrera-maila altua islatzen du. Bestalde, aipatu gorakadan hiritar guztiek zerikusia dute. Kezka hori adierazteko hona hemen datu bat: San Markoseko Mankomunitateko biztanle bakoitzak urtean 481 kg hondakin (1,32 kg/bizt./egun) sortu ditu, hau da, aurreko ekitaldian baino % 3,21 gehiago.
Hala eta guztiz ere, birziklatutako hondakinen kopuru garbia (46.981 t) Mankomunitatean sortutako hondakinen % 31,94 da. Kopuru horrek Estatuko ehunekoen buruan kokatzen gaitu, baita Europa kontzientziatuenaren zifrekin bat ere. Ideia hori indartzeko, honako datuari erreparatu behar diogu: aurreko ekitaldiko datuarekin alderatuz, hondakin birziklatuen kopurua % 8,10 gehitu dela, hau da, birziklapen-tasa hondakinen sorreraren gainetik gehitzen ari dela. Gertaera horri esker, gure hondakinen herena birzikla daiteke eta azken jomuga San Markoseko zabortegia izatea saihesten da.
Datu orokorrak gure hondakinen zatiak osatzen dituzten taldeetan banatuz gero, hurrengoa azpimarratu behar da: 2006. urtean San Markoseko Mankomunitateko hiritar bakoitzak papera eta kartoia birziklatzen lagundu duela hondakin horietatik 52,54 kg bereizi dituelako (aurreko urtean baino % 4 gehiago); horrez gain, 30,88 kg beira-ontzi bereizi ditu ( 13,96 gehiago) eta 13,65 kg/bizt/urte ontzi arin bereizi dira, 2005eko datuekin erkatuz gero, % 8,84 gehiago.
Dena delakoa, datuak onak izan arren, erne jarraitu behar dugu, asko baitago egiteke. Ildo horri jarraiki, San Markoseko Mankomunitateak, osatzen duten Udalekin lankidetzan, hondakinen prebentzioarekin konpromiso irmoa mantentzen du. Halaber, bilketa-sistemak etengabe hobetu nahi ditu eta, besteak beste, honako neurriak hartzen ditu: bilketa-zerbitzua modernizatzea, ibilbideak optimizatzea eta bilketa-maiztasunak egokitzea.
Azkenik, ingurumen-ondorioak izango dituzten zenbait ekintzen bidez informatzen eta sentsibilizatzen jarraitu behar da. Izan ere, azken helburua honakoa da: hondakinen sorrera prebenitzeko orduan, hiritar guztiak gehiago inplikatzea eta eraginkortasun handiagoaz egitea eta hondakinak sortu ostean, jatorrian bereizita birziklatzea. Prebentzioaren arloan egindako ekimenen adibide argiak txosten honetan jasoak daude.
| kg | kg/bizt. | Guztira (%) | |
|---|---|---|---|
| Sortutako hondakinak | 146.981.964 | 481 | -- |
| Zabortegira isuritako hondakinak | 100.033.730 | 327 | 68,06 |
| Gaika bildutako hondakinak | 46.948.234 | 153,69 | 31,94 |
| Papera (edukiontzietan) | 10.784.320 | 35,30 | 7,34 |
| Papera ikastetxeetan eta administrazioan (atez ate) | 1.163.565 | 3,81 | 0,79 |
| Merkataritza-kartoia (atez ate) | 4.102.378 | 13,43 | 2,79 |
| Papera eta kartoia guztira | 16.050.263 | 52,54 | 10,92 |
| Beira (edukiontzietan) | 8.115.754 | 26,57 | 5,52 |
| Beira ostalaritza-establezimenduetan (atez ate) | 1.316.990 | 4,31 | 0,90 |
| Beira guztira | 9.432.744 | 30,88 | 6,42 |
| Ontziak | 4.171.152 | 13,65 | 2,84 |
| Pilak | 42.145 | 0,14 | 0,03 |
| Ehuna | 803.778 | 2,63 | 0,55 |
| Etxeko hondakin arriskutsuak, landare-olioa eta etxetresnak | 136.662 | 0,45 | 0,09 |
| Aparatu elektrikoen eta elektronikoen hondakinak (RAEE) | 490.020 | 1,60 | 0,33 |
| Egurrak | 16.344.470 | 53,50 | 11,12 |
| Kimaketak eta hondakin berdeak | 1.887.180 | 6,18 | 1,28 |
| Neumatikoak | 61.590 | 0,20 | 0,04 |
| 2006 | 2005 | Aldaketa | |
|---|---|---|---|
| Sortutako hondakinak | 146.981.964 | 142.055.644 | 3,47 |
| Zabortegian isuritako hondakinak | 100.033.730 | 97.009.555 | 3,12 |
| Gaika bildutako hondakinak | 46.948.234 | 45.046.089 | 4,22 |
| kg | Sortutako hondakin guztiekiko % | |
|---|---|---|
| 2006 | 100.033.730 | 68,06 |
| 2005 | 97.009.555 | 68,29 |
| 2006 | 2005 | Gehitzea | |
|---|---|---|---|
| Papera (edukiontzietan) | 10.784.320 | 10.298.888 | 4,71 % |
| Papera ikastetxeetan eta administrazioan (atez ate) | 1.163.565 | 1.147.341 | 1,41 % |
| Merkataritza-kartoia (atez ate) | 4.102.378 | 3.956.018 | 3,69 % |
| Beira (edukiontzietan) | 8.115.754 | 7.484.892 | 8,42 % |
| Beira ostalaritza-establezimenduetan (atez ate) | 1.316.990 | 1.264.348 | 4,16 % |
| Ontziak | 3.852.100 | 3.832.440 | 0,51 % |
| Pilak | 46.350 | 47.038 | -1,46 % |
| Ehuna | 803.776 | 693.975 | 15,82 % |
| Etxeko hondakin arriskutsuak | 136.662 | 94.494 | 44,62 % |
| Aparatu elektrikoen eta elektronikoen hondakinak (RAEE) | 490.020 | 837.430 | - 41,48 % |
| Neumatikoak | 61.590 | 79.120 | -22,15 % |
