IT Danza duela gutxi Bartzelonako Institut de Teatre delakoan sorturiko konpainia bat da. Une honetan hamar dantzarik osatzen dute, eta konpainiaren asmoa kide guztiek hainbat teknika bereganatzea da, dantzan erabat murgilduta jarduteko benetan prestaturik egon daitezen. Proiektu honen protagonistak dantzariak dira, inolako zalantzarik gabe, bai eguneroko lanean bai eszenatokian ari direnean. Profesionalen gisa pentsatzen eta lan egiten laguntzen diete. Nortasuna garatzen, mugimenduan arintasuna bereganatzen, gorputzaren eta espazioaren beste dimentsio bat eskuratzen azken batean. Sortzaile gazte hauek beretzat propio pentsatutako koreografiak lantzen dituzte. Gainera, gure garaiko koreografo nabarmenenen dantza garaikideko errepertorioan murgiltzeko aukera ere badute dantzariek. Kontua zera baita, igarotzen ari diren prestakuntza prozesua baloratzeko aukera emango dien pizgarri bat eskaintzea, eta bere lanaren emaitza egitura berrian zein aurrerantzean izango duten esperientzia profesionalean aplikatzea. Programa honen helburua dantzariek, izango duten bi urteko esperientziaren ondoren, irizpide finkatuagoak izatea da, zer nahi duten eta zer egin dezaketen garbiago izanez gero askoz errazago izango baitzaie dituzten arte gaitasunen araberako lan esparru bat aurkitzea. IT Dansak Catherine Allard (Brussela, 1960) du arte-zuzendari; Neederlans Dans Theatre-ren dantzaria izan zen hau, eta Dantza Konpainia Nazionaleko kide sei urtez. 1996az geroztik proiektu honetan murgilduta dago, buru-belarri, eta bere lehen ikuskizunean egungo panoraman tokia irabazita duen koreografo zenbaiten lan berriak biltzen ditu, Toni Fabre frantziarrarenak, Ramón Oller katalanarenak eta Jennifer Hanna iparramerikarrarenak besteak beste, Dantza Konpainia Nazionaleko arte-zuzendaria den Nacho Duatoren koreografia batekin batera.
|
