Jarraian egituraren altxaera planimetriko eta fotogrametrikoak egin ziren, eta zurezko pieza guztiei zenbaki bana eman zitzaien xehe-xehe aztertzeko.

Zurezko egitura zaharberritzeko orduan, erabat desmuntatu zen baserria, eta zurezko pieza guztiak banan bana garbitu eta tratatu ziren.

Ahalik eta jatorrizko pieza gehien kontserbatzea izan zen baserria zaharberritzeko irizpide nagusia. Hortaz, eranskin bat paratu zitzaien soilik alde batean hondatuta zeuden piezei, eta antzeko piezak egokitu ziren oso hondatuta zeuden piezen lekuan.

Geroago, denboraren joanean galdutako elementuak berreskuratu eta muntatu ziren XVI. mendeko barruko egitura eta XVII. mendeko baserriaren irudia aurkezteko.