Gizarte Ekintzarako Moduak

Horretarako, ekintza-zerrenda bat emanda, ekintza horietako bakoitzari zenbaterainoko legitimazioa ematen dioten galdetu genien, "zeintzuk egin dituzun edo egin zenitzakeen" esateko eskatuz.

Oro har, elkarrizketatuek ez dute proposaturiko 10 ekintza horietatik askorik aipatu: elkarrizketatu bakoitzak, batez beste, hiru baino gutxiago aipatu ditu (2,91 hain zuzen ere).

Datu hau, hala ere, bere testuinguru sozial eta politikoan kokatu behar da; izan ere, estatu mailan ematen den giroarekin alderatuz gero gure inguru hau pil-pilean dagoela jo dezakegun arren, honek ez dakar gipuzkoar biztanleen partaidetza politiko eta erreibindikatiboa oso maila aipagarrietara iristea, oro har behintzat.

Aldeak oso txikiak badira ere, alde horiek (gogoan izan batez bestekoak direla) argi erakusten dute emakumezkoek gizonezkoek baino joera handixeagoa dutela aztertutako ekintzak egiteko (edo, gutxienez, legitimotzat jotzeko). Bestetik, elkarrizketatuek zenbat eta urte gehiago izan eta haien gizarte-maila zenbat eta goikoagoa izan, orduan eta handiagoa izaten da parte hartzeko modu horien alderako joera.

Proposaturiko ekintzetako bik bakarrik lortu dute gazteen erdien legitimazioa gutxienez: botoa emateak eta kalean errebindikazio edo protesta ekintzetan parte hartzeak.

Beste bi elkarrizketatuen %40k gutxienez aipatu dituzte: sindikatuetan, auzo elkarteetan, talde ekologistetan, giza eskubideen aldeko erakundeetan edo interes orokorreko arazoez arduratzen diren bestelako elkarteetan parte hartzea eta informazio politikoa hedabideetan maiz segitzea.

Beste muturrean, ekintzetako bi ez dira aipamenen %10era ere iritsi: beste inor erakunde politiko bati botoa emateko edo erakunde horretan sartzeko konbentzitzen saiatzea eta kargu politiko edo hautagai izatea.

Gizonezkoen aldean, badirudi emakumezkoek joera handiagoa dutela hauteskundeetan eta gizarte-elkarteetan parte hartzeko. Gizonezkoek, ordea, gogokoago dute kaleko protesta-ekintzetan parte hartzea eta informazio politikoa segitzea.

Bestetik, azken bi ekintza horiek onarpen zabalagoa dute helduenen artean.

Erabili ditugun aldagai sozioekonomiko guztietatik, gizarte-klaseak eragiten ditu alderik handienak: aukera politiko bati diruz laguntzea edo erakunde politiko bateko kide izatea alde batera utzirik, gainerako ekintza guztiek harrera hobea dute goiko klaseko gazteen artean.

Edonola ere, gipuzkoar gazteek ekintza politikoaren aurrean erakusten duten aldez aurretiko jarrerari buruzko datuak, espero zitekeena bezain altuak ez izanik ere, oro har beren kide espainiarrek sei urte lehenago erakusten zituztenak baino dezente altuagoak da, eta, hau ziurtatzeko oinarri enpirikorik ez badugu ere, Gipuzkoako bertako biztanleria helduak eman ditzakeen datuak baino altuagoak ere bai.