AURKEZPENA

Gipuzkoako gizarteak eraldatzen ari den ingurune ekonomiko eta sozial berrira egokitzeko erronka du aurrean. Izan ere, gure gizarteak komunikazio eta informazio teknologia berriak bultzatzen eta haiekin eroso bizitzen jakin beharko du, horretarako ikerketa eta garapena enpresa-kultura berri baten ardatz nagusi bilakatuz eta ekimen berrietarako lekua bermatuz. Hori guztia, berehalako etorkizunean gure garapen ekonomikoak eska diezazkiokeen beharrei erantzuteko gure gazteriaren jakintza moldatzearren.

Eginkizuna, gure lurraldearen garapen orekatsuari aurre egitea da. Alde batetik, gure ekonomia globala bihurtzeko igarobidea bultzatuko da eta horretarako erraztasunak eskainiko dira. Bestalde, ideien, pertsonen eta produktuen joan-etorrietarako bide berriak urratuko dira gure lurraldetik kanpoko merkatuei begira. Bide horiekin, hiriguneetan sarrera errazagoak, erosoagoak eta azkarragoak egitea lortuko da, herrigune, auzo eta abarren arteko lotura hedatuko delarik.