XEDATU DUT

Programa honetan neurri multzo bat proposatzen da, ezintasun fisikoarengatik beren kabuz mugitzeko zailtasun handiak dituztenei gizarte gorabeheretan gehiago parte hartzen laguntzeko. Zehazki, diru laguntzak emango zaizkie «ez ohiko» jardueretarako joan-etorriak egin behar dituztenean taxi zerbitzua erabil dezaten.

Foru Dekretuaren ondorioetarako, lanegunetan egunero egiten direnak dira ohiko jarduerak, eta asteburuetan edo lanegunetan baina noizean behin egiten direnak, berriz, «ez ohikoak».

2.1.Ondoko baldintzak betetzen dituztenek eska dezakete programa honetako laguntza. Baldintzak:

a)12 urte baino gehiago izatea.

b)Eskaeraren aurkezpen eguna baino hamabi hilabete lehenago gutxienez, Gipuzkoako Herrialde Historikoko herriren batean erroldaturik egotea.

c)Norberaren ezintasunarengatik garraio publikoa erabiltzeko zailtasun handia izatea eta, ezintasun maila aitortu, deklaratu eta kalifikatzeko prozedurari buruzko 1971/1999 1999ko abenduaren 23ko Errege Dekretuko 3. Eranskineko «garraio publikoak erabiltzeko zailtasunen baremoa» erreferentziatzat hartuta, ondorengo baldintzak betetzea:

c.1.Mugitzeko gurpil-aulkia behar izatea.

c.2.Mugitzeko nahitaez bi bastoi behar izatea.

c.3.Urritasun psikiko sakonak eraginda, garraiobide arruntak erabiltzeko zailtasuna izatea.

c.4.Aipatu den baremoaren arabera, 10 puntura edo gehiagora iristea.

d)Osasun egoerarengatik edo beste arrazoi batzuengatik ezgaituta ez egotea norberaren ohiko bizilekutik ateratzeko.

e)Norberaren izenean erregistratutako ibilgailurik ez izatea.

2.2.Aurreko baldintzez gain, ondorengo baremoa ere kontuan hartuko da laguntzak emateko:

Diru sarrerak laguntzaren %50 hartzeko ezarri diren gehieneko kopurukoak baino handiagoak izanez gero, ez da laguntza eskubiderik izango.

Diru sarrerak kalkulatzeko famili unitatea hartuko da oinarritzat, hau da, onuradunak, ezkontideak eta 18 urte baino gutxiagoko seme-alabek osatutakoa. Onuraduna 18 urte baino gutxiagoko seme-alaba baldin bada, famili unitatea onuradunak, 18 urte baino gutxiagoko anai-arrebek eta gurasoek osatuko dute. Elkarbizitzako unitatean 18 urte baino gehiagoko eta diru sarrerarik gabeko kideak baldin badaude, horiek ere famili unitateko kidetzat hartuko dira. Famili unitatearen urteko diru sarrerak egiaztatzeko, errenta aitorpena edo, bestela, urteko pentsioaren ziurtagiria aurkeztuko da.

Egoitzetan bizi diren ezinduen kasuan, egoitza gastuengatik ordaindutakoa kendu ondoren egingo da sarreren kalkulua.

2.3.Landa ingurunean bizi direnak I. ataleko c) eskakizunetik salbuetsi ahal izango dira, eskatzailearen udalerriko gizarte zerbitzuek taxi bonoa erabiltzeko beharrizana behar bezala justifikatzen badute. Arau horren eraginetarako, landa inguruneak izango dira bai herri gunetik urrutiratuta eta barreiatuta dauden auzune eta bizitegi guneak eta bai landa ingurunekoen izaera duten udalerriak, baldin eta osasun zentro edo antzeko herri ekipamendurik ez badute eta ekipamendu horien beharra dutenek beste herriren batera joan behar badute.

Gizartekintza Departamentuak kudeatuko ditu mugikortasuneko arazo handiak dituztenentzako garraio laguntzak, jarraibide hauen arabera:

3.1.Eskaera.

Eredu arautua erabiliz, eskatzailearen udalerriko gizarte zerbitzuetan egingo da eskaera. Gizarte zerbitzuek zerbitzuaren beharrik badagoen eta programaz baliatzeko baldintzak betetzen diren baloratuko dute eta balorazioa Gizartekintza Departamentura bidaliko dute, eskatutako gainontzeko dokumentazioarekin batera.

Eskaerarekin batera ondorengo dokumentazioa aurkeztuko da:

1.NAren fotokopia.

2.Famili unitatearen urteko diru sarrerak, errenta aitorpenaren bidez edo, bestela, urteko pentsioaren ziurtagiriaren bidez egiaztatuta.

3.Errolda ziurtagiria eta bizikidetasunarena.

4.Laguntza jasotzeko beharra zuritzen duen gizarte txostena.

3.2.Tramitazioa.

Eskaera eta gainerako dokumentazioa jaso ondoren, Gizartekintza Departamentuak ondorengo puntuak begiratuko ditu:

a)Mugitzeko zailtasun maila, ezintasun maila aitortu, deklaratu eta kalifikatzeko prozedurari buruzko 1.971/1999 1999ko abenduaren 23ko Errege Dekretuko 3. Eranskineko «garraio publikoak erabiltzeko zailtasunen baremoaren» arabera neurtutakoa. Balorazioa egin gabe baldin badago, une horretan egingo da, 2. artikuluko 3. puntuko kasuan izan ezik, laguntzaren onuradun izateko horrelakoetan ez baita aldez aurreko baloraziorik behar.

b)Norberaren izenean erregistratutako ibilgailurik ez izatea.

Hori guztia eta laguntza jasotzeko gainerako baldintzak egiaztatu ondoren, Gizartekintza Departamentuak eskaera ebatziko du.

Laguntza eskubidea 12 hilekoa izango da gehienez ere, nahiz eta bere kasuan hurrenez hurreneko berrikuntzak onartuko diren.

3.3.Erabakitzeko epea.

Gipuzkoako Foru Aldundiak sei hilabeteko gehieneko epean ebatziko du taxi-bonoaren laguntzen deialdia, 30/1992 Legeak, azaroaren 26koak, Herri Administrazioen Araubide Juridikoaren eta Administrazio Prozedura Erkidearenak, 42.2 artikuluan xedatutakoari jarraituz, aurkeztutako eskaerak organo eskudunak berariaz erabakitzeko duen betebeharra galarazi gabe, eta lege horrek 71.1 artikuluan aurreikusitakoa gertatzen ez bada.

Ebazteko epea amaitu eta organo eskudunak ebazpen adierazirik ematen ez badu, ezetsitzat joko da eskaera, aipatutako legeak 44. artikuluan dioenaren arabera.

3.4.Diru laguntzak ordaintzea eta zuritzea.

Laguntza ematea onartuz gero, hartzaileak jasotzeko eskubidea izango du eskaera udaletxeko gizarte zerbitzuetan aurkeztutako hilaren hurrengo hileko lehen egunetik aurrera. Ordainketak hiru hilero egingo dira banku transferentziaren bidez.

Laguntzak urtero zurituko dira, berritzeko unea iristen denean hain zuzen. Datu faltsuak emateak, datuak ezkutatzeak edota eman diren xederako erabili beharrean diru laguntzak beste helburu batzuetarako erabiltzeak laguntzaren galera ekarriko du, egindako iruzurrari legozkiokeen beste erantzukizunak baztertu gabe.

3.5.Kontrola eta jarraipena.

Gipuzkoako Foru Aldundiko Gizartekintza Departamentuak onuradunei emandako laguntzak berrikusiko ditu urtero eta, hala, laguntzak emateko arrazoibidetzat hartutako gorabeherak aldatu diren egiaztatuko du. Berrikuspen horretara, laguntzak emandako helbururako erabili direla egiaztatzen duten agiriak eraman behar dira beste batzuen artean. Berrikuspena egin ondoren laguntzaren beharra frogatzen bada, berritzea erabakiko da.

Beste aldetik, Gipuzkoako Foru Aldundiko Gizartekintza Departamentuak beretzat gordeko du programaren jarraipen eta garapen egokiaren helburutan behar bezainbeste kontrol egiteko eskubidea.

Ondorengo hauek laguntza galtzeko arrazoiak izango dira:

a)Laguntza hartzeko baldintzetakoren bat galtzea.

b)Programan sartzeko baldintzak aldatzea.

c)Laguntza emandako helbururako erabili dela ez zuritzea.

Taxi bonoaren erabilerari buruzko arautegia onartzen duen 1996ko abenduaren 24ko 96/1996 Foru Dekretuaren babesean onuradun izaera onartu zitzaienek beren eskubidea mantenduko dute foru dekretua indarrean sartzen denean.

Foru dekretu honetako laguntzei dagozkien aurrekontuko kredituak, Gipuzkoako Lurralde Historikoko Aurrekontuak onartzen dituen Foru Arauaren bidez erabakiko dira.

Gizartekintza Departamentuko foru diputatuari ahalmena ematen zaio urtero laguntzaren hileko kopurua eta laguntza onartzeko baremo ekonomikoa onartu eta foru dekretu hau behar bezala aplikatzeko behar diren neurriak har ditzan.

Foru dekretu honek araututako laguntzak direla eta, aurtengo ekitaldirako 24.000 euroko aurrekontu kreditua dago izendatuta Gizartekintza Departamentuaren aurrekontuko 100 zenbakiko «Komunitate eta Gizarte Ekintza» programan.

Aurtengo urtean hileko hirurogei euro eta hamar zentimokoa izango da (60,10 €) gehienez emango den laguntza.

Indarrik gabe geratuko dira foru dekretu honetan xedatutakoaren aurka doazen arau guztiak eta, batik bat, taxi bonoa erabiltzeko arautegia onartzen duen 1996ko abenduaren 24ko 96/1996 Foru Dekretua.

Foru dekretu hau Gipuzkoako Aldizkari Ofizialean argitaratzen den egunaren biharamunean sartuko da indarrean.

Donostia, 2000ko urriaren 1a.