1. Sarrera
2. Langabezia Gipuzkoan
3. Jarduketa eremuak
4. Faseak
5. Antolamendua

Langabezia da gure lurraldearen eta bertako ekonomi esparruen arazo ekonomiko nagusia.

Hala, Europako Batzordearen Liburu Zuriak ezin argiago esaten du:

"Hitz bakarra: langabezia. Irtenbiderik balego, gure herrialdeek jadanik ontzat harturik lukete. Mirarizko sendabiderik balego, jadanik ezagutuko genuke".

Gauzak horrela, Gipuzkoako Foru Aldundiko Ekonomia eta Turismo Departamentuaren gidaritzapean, euskal Udalen Elkartearekin -EUDEL- eta gure lurraldeko Eskualdeen Garapenerako Agentziekin -GARAPEN- bat etorriz, eta Europako Batzordearen laguntzarekin (FEDER arautegiaren 10. artikulua), prozesu bat ireki da esandako esparruen eskutik, hau da, Gipuzkoako enplegu gune berrien eskutik enplegua sortzeko proiektu aitzindariek zer bideragarritasun izan dezaketen eta martxan nola jar daitezkeen aztertzeko. Guzti horretarako, FEDER arautegiko 10. artikuluaren babesean proiektua onartu duen Europako Batasunak laguntza erabakiorra eskainiko du.

Enplegu Gune Berriak -esparru- izena eman zaion jarduketa honen helburua da tokian tokiko estrategiak eta proiektu aitzindariak bultzatzea, bizi kalitatearekin zerikusirik daukaten lehentasunezko sektoreetan (eguneroko zerbitzu arruntak, bizi kalitatea lortzeko zerbitzuak, kultura eta aisialdiko zerbitzuak eta ingurugiroaren alorreko zerbitzuak) enplegua sortzeko tokian tokiko ekimenaren bidez.
 
 

2. LANGABEZIA GIPUZKOAN

Guztira 63.600 lagun ditugu lanik gabe. Denok dakigu zer eragin handia duen langabeziak gure herrialdean. Lan egin nahi duten bost pertsonetatik batek ez du lanbiderik. Arazoa bereziki larria da gazte eta emakumeen artean. Beste aldetik, langabezian dauden gehienek ez dute lortu eskatu ohi den prestakuntza.

Gure arteko langabezia tasa Europako Batasunekoaren bi halakoa da; gainera, azken hamarkada honetako bilakaera negatiboa izan da oso, azken urte hauetan zertxobait murriztea lortu den arren.

Produktibitatea bera ere gero eta gehiago azkartzen ari dela kontuan harturik, ez dirudi gaur egungo hazkunde eredua gai izan daitekeenik langabezia behar adina murrizteko. Aitzitik, lan bila dabilen jendea gehitu egingo da datozen urteetan.

Alabaina, gizarte premia ase gabeak atzeman daitezke, bizi kalitatea hobetzeko eta gure ingurugiroa zaindu eta babesteko beharkizunetik eratorriak. Hau da, gure atarian badaude enplegu gune berriak sortzeko aukerak, gure gizartearen eskaera berriak asetzeaz gainera arazorik larriena, langabezia, arintzeko aukera eman dezaketenak.

3. JARDUKETA EREMUAK

Europako ekonomian oraindik ere enplegu gune berriak aurki daitezkeela abiapuntutzat harturik, enplegu sortzaileak izan litezkeen tokian tokiko ekimeneko hamazazpi esparru zehaztu dira Europako Batasunean.

Izan ere, zerbitzuen alorrean oraindik ere badaude premia ase gabeak, nahiz eta gauzatu ahal izateko badagoen eskaria eta eskaintza mailako oztoporik.

Europan zehaztu diren hamazazpi eremu horiek zer bideragarritasun duten aztertu eta egiaztatzeko, Gipuzkoan proiektu aitzindariak jarriko dira martxan, lau talde hauetan banaturik:

• Eguneroko zerbitzu arruntak
• Bizi kalitatea hobetzeko zerbitzuak
• Kultura eta aisialdiko zerbitzuak
• Ingurugiroaren alorreko zerbitzuak

Europarekin alderatuz, zenbait eremu jakinetan jarduteko premia areagotzen dituzten faktore batzuk antzeman daitezke Gipuzkoan. Horien artean ondorengo hauek aipa daitezke:

• Biztanle adindunak gero eta gehiago dira, gero eta handiagoa den bezalaxe haiek daukaten aisialdi edo gizarte eta osasun mailako laguntzen beharra.
• Etorkizunari begira merkatu oso aberatsa da, eta adinen arabera beharkizun berezikoa, aisialdi, jolas, kirol eta kulturaren demanda.
• Zenbait hiritan oso handiak dira hiri antolaketa eta ingurugiroari egindako kalteak. Oso gutxi landu da etxebizitzak behar berezietarako birgaitu eta egokitzeko politika.
• Jarduketaren lehentasunezko beste esparru bat da enplegua aurkitzeko arazoak dituen gazteriari bere burua prestatzen eta kultura bereganatzen laguntzea.
• Beste aldetik, gure ingurugiroa zaindu eta berreskuratzeak lehentasun bat izan behar du, gizarteak gero eta gehiago eskatzen duen bezalaxe.
• Biztanleen pilaketa areagotzen ari da Irun-Donostia-Tolosa ardatzean -eremu horretan bizi da biztanleen %65 baino gehiago. Hala, urte gutxi barru metropoli area deituko diogu gaur egun udal desberdinez osatutako eremu horri, eta esan beharrik ez dago horrek ekarriko duela eraginik biztanleen beharkizunetan eta zerbitzuen prestazioan.

4. FASEAK

Enplegu Gune Berriak Gipuzkoan proiektua hiru fasetan egingo da, burura eramateko aurreikusi diren 24 hilabeteetan zehar.

Hiru faseak hauek dira :

1. fasea : atarikoa. Proiektua martxan jartzea.

• Proiektua kudeatzeko organoak osatzea (Kontseilu Kudeatzailea, Batzorde Gidaria eta Batzorde Teknikoa)
• Proiektua zabaltzeko mintegi bat egitea

• Lan taldeak osatzea.
• Hautatutako enplegu gune berrien bideragarritasuna egiaztatzea eta eskaintza bultzatzeko neurriak hartzea.
• Proiektu aitzindariak definitzea eta martxan jartzea.

• Bideragarriak direla aldez aurretik egiaztatu diren enplegu gune berrietan esperientzia aitzindariak martxan jartzea.
• Enplegua sortzeko laguntzen politika garatzea (hurbiltasunaren aurrezkia eta zerbitzu txekeak).
• Enplegua sortzeko eragingarriak izan daitezkeen politikak eta enpleguaren sorrera areagotu dezakeen garapen ekonomikoko politika definitzea.

5. ANTOLAMENDUA

Proiektua garatzeko aurreikusi den antolamenduaren arabera, ondorengo organo eta eginkizunak zehazten dira:

• Kontseilu Kudeatzailea
• Proiektuaren norabide nagusiak diseinatzea.
• Enplegu gune berriak deitu kontzeptua zabaltzea eta gipuzkoarrek ezagutu dezaten saiatzea.
• Enplegu gune berriak enplegu sortzaileak izan daitezen, gizartearen parte hartzea bilatzea.
• Enplegua sortzeko Gipuzkoan egiten diren politika eta jarduketa desberdinetan proiektuko ondorioak onartuak izan daitezen bultzatzea.
• Batzorde Gidaria
• Kontseilu Kudeatzaileak zehaztutako irizpide nagusiak martxan jartzea.
• Batzorde Kudeatzaileari jarduketak proposatzea.
• Proiektuaren eskutik sortutako dokumentazioa onartu eta ofizialtzea.
• Batzorde Teknikoa
• Batzorde Gidariak zehaztutako irizpideak martxan jartzea.
• Burura eramandako jarduketei buruzko informeak egitea.
• Lan taldeak koordinatzea
• Lan taldeen kontrol eta jarraipen lanak egitea.
• Lan taldeak
• Enplegua sortzeko enplegu gune berriak zein neurriraino diren bideragarriak egiaztatzea.
• Martxan jarriko diren proiektu aitzindarien jarraipen eta neurketa lanak egitea.
 

---

Proiektuaren arduraduna: Harremanetarako pertsona:

jmaldanondo@ekonomia.gipuzkoa.net jamondarain@ekonomia.gipuzkoa.net

---