Gipuzkoako Foru Aldundia

Gipuzkoako Atari Instituzionalaren logotipoa eta orri nagusirako esteka

Hizkuntzak

Landa ingurunearen garapenerako departamentuaren egitura organikoa eta funtzionala

Apirilaren 27ko 38/2004 FORU DEKRETUA, Landa Ingurunearen Garapenerako Departamentuaren egitura organiko eta funtzionalari buruzkoa.

DEPARTAMENTUAREN EGINKIZUNAK ETA ESKUMENAK.

Landa Ingurunearen Garapenerako Departamentuari eginkizun eta jarduera esparru hauek dagozkio:

  1. Nekazaritza sustatu eta antolatzea.
  2. Abeltzaintza eta mendiak.
  3. Baso baliabideak antolatu eta hobetzea.
  4. Izadizaintza.
  5. Ehiza eta arrantzaren aberastasuna babestu, zaindu eta sustatzea.
  6. Hondartzak garbitzea.
  7. Araudian jasotzen diren gainerako eskumenak.

Departamentuaren egitura organikora itzuli

NEKAZARITZA ETA LANDA GARAPENEKO ZUZENDARITZA NAGUSIAren eginkizunak:

Nekazaritza eta Landa Garapeneko zuzendari nagusiaren eginkizuna da Zuzendaritza Nagusiko unitate organiko guztien egitekoak kontrolatu eta zuzentzea, Departamentuak zuzendaritza horri dagozkion gaietan dituen helburuak lortzearren.

Departamentuaren egitura organikora itzuli

Landa Garapeneko eta Nekazaritza Egituretako Zerbitzuaren eginkizunak:

Arduraduna zerbitzuburua delarik, Landa Garapeneko eta Nekazaritza Egituretako Zerbitzuak eginkizun hauek ditu:

— LANDA ALDEEN GARAPENARI dagokionez:

  1. Landa Garapeneko Programak prestatu eta gauzatu daitezen sustatzea. Horretarako lankidetza hitzarmenak egingo dira mendi nekazaritzako eta landa garapeneko elkarteekin, landa aldeen eta bertako biztanleriaren dibertsifikazioa eta garapen ekonomiko iraunkorrak bultzatzen duten neurrian. Hala, arreta berezia jarriko zaie zerbitzu eta azpiegituretan dauden beharrei, ahaleginak egingo dira jendea landa aldea utzi gabe bertan bizi dadin eta erraztu egingo dira alda aldeetakoen eta kalekoen arteko harremanak, diskriminazio positiboa bultzatuz.
  2. Landa lurra antolatzeko irizpideak proposatzea, bi jardun hauek bateratzen saiatuz: Alde batetik, baliabide naturalak zaindu eta nekazaritzarako eta basotarako balio handikoak diren lurrak babestea eta, beste aldetik, jarduera ekonomikoak garatu eta landa aldeko biztanleentzako zerbitzu egokiak jartzea.

— NEKAZARITZA USTIALEKUEN EGITURAK HOBETZEARI dagokionez:

  1. Nekazaritza ustialekuen egiturak hobetzeko laguntza planak proposatu eta aurrera eramatea eta, produktibitatea eta lehiakortasuna gehitzeko, ustialekuei aholku teknikoa eta ekonomikoa ematea.
  2. Mendi aldeko ustialekuetako nekazaritza errentak hobetzeko neurriak hartzea eta FEOGA-Bermeak ezarritako laguntza zuzenak eta primak tramitatzea.
  3. Administrazioko beste organismo batzuekin koordinatuta, nekazaritza turismoko etxea jartzeko berariazko egintzak proposatu eta aurrera eramatea, baserrietan nekazaritzatik eta abeltzaintzatik etorritako errentak osatzeko baliagarriak direnez gero.
  4. Nekazari lana erretiro garaiaren aurretik uzten laguntzeko programen bitartez, bultzatzea nekazari zaharrenen ordez sar daitezen libre geratutako nekazaritza ustialekuen bideragarritasun ekonomikoa hobetu dezaketenak eta, aldi berean, nekazaritza uztea erabakitzen duten nekazariei diru sarrera batzuk ziurtatzea.
  5. Gazteak nekazaritzan has daitezen neurri lagungarriak ezarri eta, hala, belaunaldi aldaketa eta lanpostu sorkuntza bultzatzea.
  6. Europako Batasunaren araudietan ezarrita dauden laguntzen bitartez ahalegintzea bateragarriak izan daitezen nekazaritza produkzioaren metodoak, batetik, eta ingurumena, paisaia eta baliabide naturalak zaintzeko eskakizunak, bestetik.
  7. Batetik, zabalkunde programak proposatzea nekazariak ohartarazteko merkatuen bilakaerari egokitzeak eta gizarte demandari aurrea hartzeak duten garrantziari buruz, batez ere jakien segurtasunari, produktuen kalitateari, abereen ongizate eta osasunari eta ingurumenaren babesari dagokienez, eta, bestetik, gizarteari oro har agertzea nekazaritzak duen balio estrategikoa eta gizarteari berari egiten dion mesedea lurralde antolamenduaren, ingurumenaren eta landa ondarea babestearen ikuspuntuetatik.
  8. Tramitatu eta ebaztea Nekazaritza Ustialekuen Erroldarekin eta Nekazaritza Makineriaren Erroldarekin zerikusia duten izen emateak eta gainerako eginbideak.

— ESKUALDEKO NEKAZARITZA BULEGOEI dagokionez:

  1. Nekazaritza administrazioaren zerbitzuak nekazarientzat ahalik eta hurbilenak izan daitezen bultzatzea, alor horretako gai guztien tramitazioa erraztuz.
  2. Nekazariei aholkularitza eta informazio zerbitzua «in situ» ematea.
  3. Nekazaritza sektoreari zuzendutako edozein laguntza motaren tramitazio administratiboa koordinatu eta arintzea.
  4. Ordainketaren eskuordetzea izanda edo izan gabe, landa garapeneko neurrien nahiz dirulaguntza zuzenen zerbitzu teknikoa neurri baten bere gain hartzea, Euskal Autonomia Erkidegoko Erakunde Ordaintzailearen eta Gipuzkoako Foru Aldundiaren arteko Lankidetza Hitzarmenean ezarritakoaren arabera.

Departamentuaren egitura organikora itzuli

Landare Alorreko Unitatearen eginkizunak:

Arduraduna landare alorreko koordinatzailea delarik, Landare Alorreko Unitateak eginkizun hauek ditu:

— OROKORREAN:

  1. Frutagintzaren ezarpena bultzatzea oro har.
  2. Baratzezaintzaren hedapena bultzatzea oro har, teknologia egokiak erabiltzea sustatuz ahal diren emaitza ekonomiko onenak izateko eta ingurumena zainduz.
  3. Bultzatzea beste laborantza interesgarriak ezarri eta horiekin saiakuntzak egin daitezen.

— NEKAZARITZA EKOIZPENAREN alorrean:

  1. Jarduera programak finkatzea, Departamentuko beste lan unitate batzuekin eta sektoreko elkarte profesionalekin koordinatuta.
  2. Ongarri biltegietan eta ereiteko hazien saltokietan ikuskapen teknikoak egitea eta lehengaien kalitateari buruzko espedienteak bideratu eta substantziatzea.
  3. Belar espezieen, produktu behartuen eta zurezko espezieen landaketan teknika berriak sartu eta ebaluatu, ekoizleen elkarteekin lankidetzan.
  4. Sagardotarako sagastien landaketak bultzatzea, dauden barietateak hobetzea eta, sagardoaren kalitatea hobetzeko, elkarte profesionalekin elkarlanean aritzea.
  5. Kasuan kasuko jatorrizko izendapenarekin elkarlanean aritzea, mahatsondoak landatzeko laguntza teknikoari eta txakolina egiteari dagokienez.
  6. Biltegi eta ardandegietako ardo eta muztio izakinen aitorpenak eta mahats produkzioarenak kontrolatzea eta landaketa eskubideen banaketak eta eskualdaketak zehaztea.
  7. Kalitatea Fundazioarekin elkarlanean aritzea, kalitatezko barazkiak eta fruta ekoizteko eta, bereizgarri egokiak erabiliz, horiek sustatzeko.
  8. Ekoizleen elkarteekin lankidetza hitzarmenak egin daitezen bultzatzea, haien jarduera tekniko, ekonomiko eta sozialak indartzeko.
  9. Bultzatzea metodo ekologikokoak erabiltzen dituen nekazaritza, produkzio integratua eta, jardueraren alderdi ekonomikoa ahaztu gabe, ingurune naturala errespetatzen duen beste edozein teknika ere.
  10. Eusko Jaurlaritzarekin eta ekoizleen elkarteekin batera arittzea I+G proiektuak prestatzen eta horien jarraipena egiten.
  11. Bertako artoen lerroetako hozi plasmen bankua mantentzea, NEIKER sozietate publikoarekin lankidetzan.

— LABOREAK ZAINTZEKO alorrean:

  1. Soroak eta uztak zaintzea, landareentzat kaltegarriak diren ereagileak detektatu eta, behar izanez gero, kaltetutako tokien mugak zehazteko.
  2. Landare osasuneko derrigorrezko kanpainak planifikatu, antolatu eta zuzentzea, prebentzio neurri egokiak hartuz landaketa eta aprobetxamenduen osasuna bermatzeko.
  3. Landare produktuak biltegiratzearekin eta kontserbatzearekin zerikusia duten garraiobideek eta lokalek landare osasunari buruz bete behar dituzten derrigorrezko neurriak hartzea, indarrean dagoen araudiaren barnean.
  4. Ongarriei eta landare osasuneko produktuei buruzko araudia garatu eta betearazea.
  5. Segurtasun Kimikoko programetan parte hartzea, Eusko Jaurlaritzako Nekazaritza eta Arrantza Sailarekin eta Osakidetzako zerbitzuarekin elkarlanean.
  6. Ugalketarako hazi, landare eta landare organoen osasun egoera kontrolatzea, landare gaixotasunik heda ez dadin.
  7. Barazki eta frutek jatorrian izan dezaketen pestizida hondarren gehieneko mugari buruzko araudia betearaztea, Fraisoroko Nekazaritza Laborategiarekin elkarlanean.
  8. Gipuzkoako Lurralde Historikoko ezaugarri agroklimatikoen azterketa fisiko-fenologikoak egitea, eta lehengaiak eta laborantza teknikak erabiltzerakoan lortzen den errentagarritasunari buruzko azterketa ekonomikoak egitea.
  9. Tramitatzea ondorengoak Pestizida Etxe eta Zerbitzuen Erroldan sartzeko egin behar diren izen-emateak eta gainerako oharpenak: Pestizida etxe eta zerbitzuak eta desinfektatzen eta arratoi nahiz intsektu kentzen aritzen diren enpresak.
  10. Tramitatzea ondorengoak Landare Osasuneko Erroldan sartzeko egin behar diren izen-emateak eta gainerako oharpenak: Barazki, lore, fruta eta baso mintegiak.

Departamentuaren egitura organikora itzuli

Abeltzaintza Zerbitzuaren eginkizunak:

Arduraduna zerbitzuburua delarik, Abeltzaintza Zerbitzuak eginkizun hauek ditu:

— ABELAZKUNTZAREN alorrean:

  1. Azienda ugaldu eta hobetzeko erabilitako material genetikoaren kalitatea kontrolatzea. Ugalketa teknikak aplikatzeko zerbitzuak ezartzea. Estaldura eta funtzionamendua kontrolatu eta ebaluatzea. Abere espezie eta arrazentzat balio genetiko handiko hodi-plasmen bankuen sorrera bultzatzea.
  2. Aziendaren hobekuntza genetikoa lortzeko, ekoizpenaren eta genealogia erregistroen kontrola garatzea. Azienda ekoizpenen balioa eta kalitatea gehitzeko, beste programa batzuen garapena bultzatzea.
  3. Gipuzkoako aziendaren hautaketa bultzatzea, ganadu lehiaketak sustatuz, antolatuz, koordinatuz eta arrazionalizatuz. Azienda hautatuaren ugalketa bultzatzea, espezie eta arraza desberdinetako abereak birjartzeko.
  4. Eskualdeko, Gipuzkoako eta probintzien arteko abere lehiaketak kudeatu eta koordinatzea.
  5. Laurgaingo abeltzaintza ustialekua kudeatzea (Aia).
  6. FEOGA-Bermeko diru-laguntza zuzenak, oro har «abeltzaintzako laguntzak» deiturikoak, kudeatzea, Euskal Autonomia Erkidegoko Erakunde Ordaintzailearen eta Gipuzkoako Foru Aldundiaren arteko lankidetza hitzarmenean ezarritakoaren arabera.
  7. Gipuzkoan galtzeko zorian dauden bertako arrazen baliabide genetikoak gorde daitezen bultzatzea. Arraza horiek dira, besteak beste, Pottoka, Betizu, Terreña, Euskal Oiloa, Sasi ardiak eta Euskal artzain-txakurra izenekoak.
  8. Instalazioen kokalekuari eta eraikuntza ezaugarriei, produkzio metodoei, ugalketari, nutrizioari eta animalien hobekuntza genetikoari buruzko araudia betetzen dela bermatzea, eta gai horiei buruz sektoreko erakundeekin egiten diren hitzarmenak ikuskatzea.
  9. Animalien nutrizioan erabilitako produktu eta tekniken ekoizpena, kontsumoa eta erabilgarritasuna neurtzea.
  10. Ustiapen sistemak, ustialekuak dauden tokiak eta haien eraikuntza ezaugarriak eta hondakin organikoak deuseztatzeko eta ustiatzeko metodoak erregistratu eta kontrolatzea.
  11. Abeltzaintzako produktuen jatorriko kalitatea, bereziki giza kontsumorako direnena, sustatu eta kontrolatzea.
  12. Erakunde lankideen bitartez nekazaritza eta abeltzaintzako zerbitzuak bultzatzea, ustialekuen kudeaketan profesionaltasun eta eraginkortasun handiagoak lortzearren.
  13. Abeltzain elkarteekin egindako hitzarmenak koordinatu, kontrolatu eta haien jarraipena egitea.

— ABERE OSASUNEKO alorrean:

  1. Abeltzaintza ustialekuen eta abelburuen erroldak egitea, espezieen eta ekoizpen gaitasunaren arabera.
  2. Etxeko animalien identifikatu eta dokumentatzeko programak prestatzea. Animalien identifikazio eta mugimenduen datu base eragileak mantentzea, bai Gipuzkoakoak eta EAEkoak eta baita Europakoak ere. Identifikazioaren araudia betetzen den egiaztatzeko kontrol puntuak ezartzea.
  3. Epidemia-zaintzako sistema iraunkorra mantentzea, gure aziendari kalte egin diezaiokeen edozein zoonosi edo epizootiari ateak ixteko eta horrelakoak kontrolatu eta errotik kentzearren presako neurriak ezartzeko.
  4. Gipuzkoa barruko nahiz Gipuzkoa kanpotik edo kanporako abere mugimendua kontrolatzea. Animaliak biltzen diren tokietan, hots, feria, azoka, bilgune, operadore, proba edo dema eta abarretan, animalien osasuna eta identifikazioa zaintzea.
  5. Abereen gaixotasunei aurre egin eta errotik kentzeko, osasun programak egin eta aurrera eramatea, behar diren prozesuak abian jarrita: Informazioa, diagnostikoa, tratamenduak, inmunizazioa, hiltzea, desinfekzioa, eta abar.
  6. Animaliak Babesteko Legea bete eta garatzea: Zakurren identifikatu eta erroldatzea, animalia arriskutsuen kontrola eramatea, animalien arteko probetan dopinga kontrolatzea, utzitako animaliak jasotzea eta abar.
  7. Abeltzaintzaren gaineko jardueren erroldak garatu eta mantentzea, esate baterako zoologia guneena, ganadu garraiolariena, ganadu garraioko ibilgailuena, tratante eta operadoreena eta ibilgailuen desinfekzioarena.
  8. Tramitazio administratiboa bai animalientzako osasun produktuak ekoizteko baimen, erregistro eta kontrolarena eta baita produktu horiekin zerikusia duten industrien osasun homologazioarena ere.
  9. Erkidegoko abereen osasunari erasaten dion edozein prozesu gertatzen bada, nahiz eta noizean behingoa izan eta infekzio edo parasito mailakoa ez izan, laguntza teknikoa ematea. Diagnosiaren eta borroka nahiz prebentzio metodoaren mailakoa izango da batez ere.
  10. Abeltzaintzako ekoizpen baliabideak kontrolatzea, esate baterako, animalien ongizateari buruzko arautegia, aziendarentzako pentsu eta elikagaien osasun kalitatea, hildako animaliak kentzea, azpiproduktuak eta konfiskazioak.
  11. Osasunaren ikuspuntutik batez ere, abeltzaintzako produktuen jatorriko kalitatea sustatu, bermatu eta kontrolatzea eta, horrela, produktu horiei bideragarritasun bete-betea ematea.
  12. Epizootiei eta nekazaritzako elikagaien segurtasunari buruzko lege eta erregelamenduetako xedapenak, nazioarteko hitzarmenak eta gai horiekin lotutako sektoreetako erakundeekin egindakoak betetzen direla bermatu.
  13. Zigor espedienteak irekitzea, osasunari, animalien identifikazioari, nekazaritzako elikagaien segurtasunari eta animaliak babesteari buruzko arautegiak nahiz abeltzaintzan indarrean dauden gainerako lege xedapenak hausten direnean.
  14. Parte hartzea Aberekin SA eta Ardiekin SA sozietateetako eta abeltzaintzarekin lotura duten beste enpresa batzuetako batzorde teknikoetan. Animalien osasunean eta ekoizpenean espezializatutako mahai eta batzorde teknikoetan parte hartzea.

Departamentuaren egitura organikora itzuli

Fraisoroko Zentroaren eginkizunak:

Nekazaritza Laborategiko Unitatea eta Serologia eta Intseminazio Laborategiko Unitatea haren mendean daudelarik, Fraisoroko Zentroak bere zerbitzuak eskainiko dizkie Landa Ingurunearen Garapenerako Departamentuari, Foru Aldundiko gainerako departamentuei eta zerbitzu eskaera egin liezaioketen beste instituzio eta partikularrei. Arduraduna Zentroko koordinatzailea delarik, Fraisoroko Zentroak eginkizun hauek ditu:

— NEKAZARITZAKO LABORATEGIA. Laguntza teknikoa:

  1. Landare ekoizpenari dagokionez, analisi fisiko eta kimikoak egitea, esate baterako, nekazaritzako lurrena, lur kutsatuena, substratuena, hondakin eta medeagarri organikoena, soluzio elikagarriena, ongarriena eta hostoena.
  2. Nekazaritzako elikagaien kalitateari dagokionez, analisiak egitea, esate baterako, fruta, barazki eta beste elikagai batzuetako nahiz lurreko kutsatzaileena eta pestizida hondakinena.
  3. Animalien nutrizioari dagokionez, analisi fisiko-kimiko eta kimiko-enzimatikoak egitea, bazka, pentsu eta lehengaien nutrizio balioa jakiteko.
  4. Urei eta isurketei dagokienez, kontrol analitikoa egitea biztanleriarentzako uraren edangarritasunari eta euri, ibai eta abarretako uraren kutsadurari buruz, batetik, eta nekazaritza-abeltzaintzako eta industriako isurien indar kutsatzaileari buruz, bestetik.
  5. Belar naturaleko kirol zelaiei dagokienez, zelaiak egiteko, hobetzeko eta zaintzeko proiektuak egin eta aurrera eramatea eta Joko Kalitatearen Arauak, material eta nahasketak, kirol zelaietako zoruak eta abar kontrolatzea.
  6. Arlo horiekin zerikusia duten gaietan aholkularitza eta zabalkunde lana egitea, lan taldeetan parte hartuz, txostenak eta argitalpenak eginez, ikastaro eta hitzaldiak emanez, etab.
  7. Zerga bereziei dagokienez, Foru Ogasuneko Zerga Berezien Zerbitzuak bidalitako laginei buruzko irizpenak (hidrokarburo, alkohol, edari alkoholdun eta abarretan) egitea.

— SEROLOGIA LABORATEGIA: Serologia laborategiaren eginkizuna da analizatzea abereen osasun kanpainetan ateratako odol sueroak —bai abereak berritzeko eta bai jarraipena egiteko kanpainetakoak— eta edateko uraren mikrobiologia. Kanpainetarako material osagarria banatzea eta analisi patologikoa egiteko laginak bidaltzea ere laborategiaren eginkizunak dira.

— INTSEMINAZIO UNITATEA: Intseminazio Unitatea arduratuko da banatzeaz albaitari eta abeltzainei Aberekin Zentrotik datozen hazi dosiak, batetik, eta nitrogeno likidoa nahiz hainbat material osagarri, bestetik.

Departamentuaren egitura organikora itzuli

MENDIETAKO ETA NATURA INGURUNEKO ZUZENDARITZA NAGUSIAren eginkizunak:

Mendietako eta Natura Inguruneko Zuzendaritza Nagusiari dagokio unitate organiko horren eginkizunak kontrolatu eta zuzentzea, Zuzendaritzarenak diren gaietan Departamentuaren helburuak lortzearren.

Departamentuaren egitura organikora itzuli

Basozaintzako eta Natura Inguruneko Zerbitzua:

Arduraduna zerbitzuburua delarik, Basozaintzako eta Natura Inguruneko Zerbitzuak eginkizun hauek ditu:

  1. Gipuzkoako Lurralde Historikoko mendiei buruzko lege-arauak behar bezala bete daitezen zaindu eta kontrolatzea.
  2. Foru Aldundiaren ondareko mendiak, herri onurako mendiak, mendi babesgarriak eta kontsortzietako mendiak administratu, kudeatu, zaindu eta babestea. Halaber, horien guztien lurralde osotasuna babestea.
  3. Mendi horietako basoak eta azpiegiturak antolatu eta hobetzea, basoak berrituz, lurra landuz eta mendi-bideak eginez.
  4. Herri onurako mendietako ustiapenak proposatzea, nola Foru Aldundiaren ondarekoak hala udalenak eta babesgarrienak, eta helburu horrekin seinaleztapenak, kubikazioak eta balorazioak egitea eta ezaugarri teknikoen orriak idaztea.
  5. Baimentzea mendi publiko eta pribatuetako antolaketa planak eta kudeaketako plan teknikoak.
  6. Ebatzi edo egin daitezen, honako egintzak sustatu eta/edo proposatzea:
    • Mugaketak, abelbideak, mugarri jartzeak, okupazioak eta trukaketak herri onurako mendietan.
    • Mendien herri onura aitortu eta mendi horiek katalogoan sartzea.
    • Baso lurrak babestu eta zaintzeko, uharrak zuzentzeko eta lur ezegonkorrak finkatzeko, urak eta basoak babestu eta lehengoratzea.
    • Herri onurako mendietako kontsortzioak onartu eta desegitea.
    • Mendi babesgarriak katalogatzea.
    • Mendiak baloratu eta eskuratzea.
    • Aldundiaren ondareko eta kontsortzioetako mendietako ustiapenak besterentzea.
    • Baso berritzeak egiteko eta baso lanak sustatzeko hitzarmenak egitea.
    • Basozaintza Administrazioak esku hartzerik ez duenean, baso berritzeko hitzarmenak onartzea.
  7. Herri Onurako Mendien Katalogoa artatzea eta katalogo hori handitu eta zabal dadin proposatzea.
  8. Erakunde publikoen ondareko mendietan edo partikularrenetan zuhaitz mozketak egiteko baimenak eman edo ukatzea.
  9. Laguntza Planaren barnean basozaintzako laguntzak tramitatu eta aztertzea, eta bidezko direnak ematea proposatzea.
  10. Baso suteak prebenitu, zaindu, atzeman eta itzaltzea, Suhiltzaile Zerbitzuarekin eta babes zibileko organoekin koordinatuta.
  11. Nekazaritza eta basozaintza lanetan erreketa kontrolatuak egiteko baimenak ematea.
  12. Baso izurriak prebenitu eta suntsitzea.
  13. Beren mendietan hobekuntzak egin ditzaten, partikularrak aholkatzea.
  14. Basogintzaren sektorean lan enplegua sustatzea.
  15. Udalen eta Aldundiaren ondareko mendiak baso berritzeko, Arizmendiko mintegia eta herri onurako mendietako aldi bateko mintegiak kudeatzea.
  16. Herri onurako mendietan eta Aldundiaren ondarekoetan antolatu eta hobetzea larre ustiapenak eta artzaintza nahiz basogintzako lanak, kasuan kasuko proiektuak eta plan teknikoak eginez.
  17. Erakunde publikoen ondareko mendietan eta partikularrenetan larre hobekuntzak eta tratamenduak egiteko proiektuei buruz aholkatu eta txosten teknikoak egitea.
  18. Europar Batasunaren erregelamenduak aplikatuz, basozaintzako inbertsioen aldi biko finantzazioa proposatzea.
  19. Basoetako sute, ustiapen eta diru laguntzei buruzko estatistikak egitea.
  20. Basozaintzako inbertsioei dagokienez, kudeatzea izendatutako baliabide ekonomikoak eta Katalogoko mendien ustiapenetik eratorritako diru sarrerak, Hobekuntza Fondoa barne delarik, eta likidatzea tasak, emandako zerbitzuen prezio publikoak eta isunak.
  21. Lur hiritarrezinari dagokionez, udalen hiri antolamenduko dokumentuei buruzko txostenak egitea.
  22. Zigor espedienteak irekitzea mendiei, ehizari, arrantzari eta natur guneen nahiz basa landare eta animalien babesari buruzko araudiak urratzeagatik.
  23. Maila askotako bio-aniztasuna (genetikoa, espeziena, biztanleriarena eta komunitatearena) zerrendatu eta kudeatzea.
  24. Bio-aniztasunari buruzko jakintza ikertu, erakutsi eta zabaltzea.
  25. Kudeatzea europar intereseko habitat eta espezieak, 79/409/CEE eta 92/43/CEE europar arteztarauetan edo haien ordezkoetan jasotakoak.
  26. Landu eta burura eramatea Natura 2000 Sarean jasotako Komunitate Garrantziko Lekuen kudeaketa planak.
  27. Neurtzea plan edo proiektu nabarmen erasangarriek Komunitate Garrantziko Lekuetan duten eragina, bai bakarka bai beste plan edo proiektuekin konbinatuta.
  28. Burura eramatea natur baliabideen antolamendu planetako zehaztapenak.
  29. Kudeatu eta administratzea Gipuzkoako naturagune babestuak, Euskal Herriko Natura Babesteko Legean jasotakoak: Natur parkeak, biotopo babestuak eta zuhaitz bereziak.
  30. Zaintzea naturagune babestuen alorrean bete daitezen haiek babesteko erabaki litezkeen arauak Natur Baliabideak Antolatzeko Planean edo, bere kasuan, hura aitortzeko arauan, eta egin eta ematea bidezkoak diren txosten eta baimenak.
  31. Natur Baliabideak Antolatzeko Planeko irizpideekin bat etorriz landu eta tramitatzea erabilera eta kudeaketako plan gidariak.
  32. Derrigorrezko informeak egitea inguruneko fisikoan egindako jarduerei buruz, baldin eta naturgune babestuetan eraginik badute.
  33. Urteko txostena egitea naturgune babestuen gaineko jarduerei eta emaitzei buruz.
  34. Idatzi eta burura eramatea arriskuan dauden espezien euskal katalogoan jasotako espezien gaineko kudeaketa planak, populazio horien errekuperazio, kontserbazio edo erabilera sustatzea eta, era berean, horien habitatak babestu eta zaintzea.
  35. Baimenak ematea espezie katalogatuetako aleak harrapatzeko eta arrautzak, umeak eta haziak edo propaguluak biltzeko, helburua zientifikoa edo kulturala edo espeziea beste toki batean sartu edo birpopulatzea denean.
  36. Birsartze planak prestatu eta burura eramatea, Euskal Autonomia Erkidegoan garai historiko ez hain zaharrean desagertu ziren eta euskal habitat naturalak berriro okupatzeko aukera izango luketen espezie eta subespezietako bakoitzarekin.
  37. Espezie babestuak direla eta, salbuespenak erabakitzea, legeek aurreikusitako gorabeheraren bat gertatzen denean.
  38. Baimenak ematea flora eta faunako espezieak sartu edo birsartzeko edo espezie horien populazioak ingurune naturalean errotzeko.
  39. Baso fauna lehengoratu edo birsartzeko zentroak sortu eta kudeatzea.
  40. Ibaietako habitata eta arrain ondarea nahiz ondare biologikoa zaindu, kontrolatu, hobetu eta berritzea.
  41. Ibai uretako ehiza nahiz arrantza baliabideen ustiapen antolatua bultzatu, baliabide horiek zein egoeratan dauden ebaluatu eta kudeaketako molde egokiak ezartzea.
  42. Bere eskumen esparruko gaiei atxikiz, ibai ubide eta uretako obra, okupazio eta ustiapen proiektuei buruzko informazioa ematea gaiaren araberako organo eskudunari.
  43. Arrain eta ehiza haztegien errolda egin eta mantentzea.
  44. Hondartzetako garbiketa lanak egin eta kontrolatzea.

Departamentuaren egitura organikora itzuli

IDAZKARITZA TEKNIKOA:

Departamentuko Idazkaritza Teknikoa foru diputatuaren menpean egongo da hierarkikoki eta zuzendarienean funtzionalki, eta 1984ko maiatzaren 30eko 3/84 Foru Arauak[1], Gipuzkoako Lurralde Historikoaren Gobernu eta Administrazioari buruzkoak, 34. artikuluan aipatzen dituen eginkizunak beteko ditu.

Departamentuaren eskumenen barruan, Idazkaritza Teknikoak eginkizun hauek ditu:

  1. Departamentuko sistema informatikoa zerbitzuekin eta unitateekin koordinatzea eta, halaber, Departamentu osoarentzat interesgarriak diren programa berriak jartzea eta garatzea.
  2. Kontrolatzea organo eskudunek tramitatutako egintza eta ebazpenen legezkotasuna eta herri administrazioen kontratuei buruzko legeari atxikitako espedienteena.
  3. Herri administrazioen kontratuei buruzko legeari atxikitako espedienteak kudeatu eta tramitatzea.
  4. Departamentuaren eskumeneko xedapen arauemaileen azterketa, lanketa eta jarraipena zuzendu, bultzatu eta gainbegiratzea.
  5. Departamentuko gaiei atxikita, foru diputatuaren edo zuzendari nagusien irizpideen arabera lantzea xedapen orokorren proiektuak eta beste herri administrazio publikoekin eta erakunde publiko eta pribatuekin lankidetza hitzarmenak edo/eta protokoloak.
  6. Foru diputatuari eta Departamentuko gainerako organoei eta unitateei lege aholkularitza eskaintzea, eta eskatzen dizkioten irizpenak eman eta kontsultei erantzutea.
  7. Departamentuko Erregistro Orokorra, Agiritegia eta Fede Publikoa.
  8. Departamentuaren aurrekontuaren aurreproiektua egitea, zerbitzuak eta zuzendaritzak koordinatuta.
  9. Departamentuaren jarduera ekonomikoa kudeatu, tramitatu eta kontabilitatez kontrolatzea.
  10. Urraketa administratiboei buruzko zigor espedienteak izapidetzea.
  11. Foru Administrazioaren Kalitaterako Departamentuarekin elkarlanean eta departamentu horren berariazko eskumenei erasan gabe, koordinatu eta sustatzea pertsonen eta prozeduren kudeaketaren antolamendua, hobekuntza eta arrazionalizazioa: Prestakuntza, giza baliabideen planak, kalitate planak, laneko prebentzioa eta osasuna.
  12. Parke naturaletako idazkaritza eramatea.
  13. Gipuzkoako Ehizako Lurralde Kontseiluko eta Gipuzkoako Ibai Arrantzako Kontseiluko idazkaritza eramatea.
  14. Bere lan esparruari atxikita, egotzi edo eskuordetuko zaizkion gainerako eginkizunak.

Departamentuaren egitura organikora itzuli


1. oharra: 3/1984 Foru Araua indargabetua dago. Foru Arau horren 34. artikuluaren ordezkoa 2005eko uztailaren 12ko 6/2005 Foru Arauaren, Gipuzkoako Lurralde Historikoaren Erakunde Antolaketari, Gobernuari eta Administrazioari buruzkoaren. 64.3 artikulua da (137 zk. GAO, 2005eko uztailaren 20koa).

Informazio legala

Gipuzkoako Atariko logotipoa eta orri nagusirako lotura